طريقة فتح حساب في مصرف التنمية الدولي لسحب ارباح اليوتيوب وعن تجربة شخصيا

السلام عليكم ورحمه الله وبركاته 🙋

موضوعنا اليوم راح يتحدث عن فتح حساب في مصرف التنمية الدولي

لسحب ارباح اليوتيوب وطبعا عن تجربة شخصية لان ما احب اشرح عن شي اذا ما اجربه 

قبل لا نبدي ممكن اصير تغيرات بطريقة التقديم أو بكلفة ايداع مبلغ بالحساب وغيرها اني دا احجي عن تجربة بشهر 

21/6/2021

في البداية راح يكون الموضوع كلش طويل حتى اشرح كلشي بالتفصيل وايضا لي تجارب مع مصارف اخرى 

نبدي مع مصرف اشور الدولي فرع تكريت بسنة 2018 فتحت حساب يمهم لغرض سحب ارباح اليوتيوب والحمدلله تم فتح الحساب وايضا تم سحب الارباح بكل سهولة بعدين صارت عندي ارباح جديدة ولازم هم اسحبها رحت الهم قبل اربعة اشهر تقريبا شهر الثاني من 2021 كتلهم اريد افتح حساب جاري كالو لغرض شنو كتلهم لسحب ارباح اليوتيوب كالو اسفين وقفنا التعامل مع اصحاب قنوات اليوتيوب ليش ما اعرف هنا بدأت مشكلة البحث عن مصرف اخر اكو مصرف ثاني قريب عليهم اسمه مصرف الخليج التجاري رحت الهم ونفس الطريقة كتلهم اريد افتح حساب جاري لغرض سحب ارباح اليوتيوب كالو اي عادي بس اتودع مبلغ 250 الف دينار كتلهم اوك فتحت الحساب وكملت وجانو كلش متعاونين من مدير الفرع الى باقي الموظفين المهم رجعت للبيت دخلت تفاصيل الحساب بالادسنس وره 12 ساعه بالضبط وصلتني رسالة ع الايميل ومكتوب تم ارسال الارباح وراح توصلك خلال 5 ايام وانتظرت لليوم السادس وماكو شي وصلتني رسالة من الادسنس انو تعذر معالجة الدفعة يعني مدا تصل الارباح للمصرف شنو السبب ما اعرف رجعت سويت اعادة ارسال من جديد وهم نفس الشي وره 5 ايام او 6 توصل رساله تعذر معالجة الدفعات اتصل ع المصرف كالو موصلنه شي وكررت العمليه يمكن 4 مرات ونفس الشي 😐

بعدين كلت ابحث عن مصرف اخر راسلت مصرف بغداد كالو اي نفتح بس شروطهم شوي تعجيزية يردون ويه المستمسكات صورة لحساب الادسنس وصورة للقناة وصورة لتدفق المشاهدات وبعدين لو يوافقون ع فتح الحساب او ميوافقون شفت الشغلة طويلة 

رجعت سويت بحث بالفيس وع اليوتيوب كالو افضل مصرف هو مصرف التنمية الدولي

لان اغلب اصحاب القنوات فاتحين حسابات يمهم لسحب ارباح اليوتيوب

المهم راسلتهم ع الفيس كالو اي عادي نفتحلك حساب 

المشكلة وين ما عدهم فرع بتكريت 😔😕

يابه فروعكم وين دزلي صورة بيها الفروع واقرب فرع عليه هو فرع كركوك 

يابه المستمسكات شنو 

كذا وكذا مثل ما مذكورة بالصورة ادناه 

اكيد الصورة واضحة 

هوية العمل المقصود بيها اذا انت موظف قدم الهم الهوية مالتك او اذا طالب قدم الهم هوية طالب وهكذا

ملاحظة المستمسكات استنسخها كلها قبل لتروح عليهم

وقدمها الهم يعني متحتاج تاخذ الاصليات وياك بس من باب الاحتياط اخذها وياك 😁

المستمسكات الشخصية هي

جنسية

شهادة جنسية

بطاقة سكن 

بطاقة تموينية

هوية عمل المقصود بيها هوية موظف او هوية طالب وغيرها

جواز سفر ضروري جدا

صورتين

اتصلت ع المصرف وجاوبتني المديرة 

وسألت كم سؤال وجانت كلش متعاونه ويايه 

واجاوب على كل الاسئلة الي طرحتها الها

وره مكملت هم رجعت اتصلت بيه لغرض كم سؤال عادي

المهم

اخذت المستمسكات وكبل بوجهي لكركوك طبعا موقع المصرف 

بشارع بغداد مجاور جامع الحاجة صبرية بيناتهم تقريبا 20 متر

المهم وصلت

اكو تفتيش روتيني بالباب طبعا اشكر الحرس على ابتسامتهم الجميلة

دخلت حجيت ويه الموظف وقدمت الاوراق جان كلش لطيف ويايه كملت اجراءات فتح الحساب 

طبعا جان لازم اودع مبلغ بسيط بالحساب وهنا صار سوء تفاهم ونسيت مودعت شي 

طبعا من تفتح الحساب افتح حساب جاري وبعملة الدولار وتكدر تفتح بعملة الدينار بس اني افضل دولار

اذا تفتح حساب بعملة الدولار لازم اتودع مبلغ 100 دولار

واذا تفتح بعملة الدينار لازم اتودع مبلغ 100 الف دينار

وطبعا يختلف من فرع الى اخر اني كالو حتى لو 75 دولار هم يرهم 

المهم يكون اكو رصيد بحسابك

شوف انت شكد تتفق وياهم وودع مبلغ بحسابك 

وايضا مبلغ الاستقطاع هو 1% من مبلغ الحوالة كمثال على ذلك

خلي نفرض ارباحك 500000 الف دينار 

تضرب المبلغ الكلي في واحد بالمئة تقسيم 100 يطلع المبلغ المستقطع هو

5000 الاف دينار

المهم كمل الموظف كلشي وايضا كتله اريد ماستر كارد مربوطة بحسابي حتى اكدر اسحب الارباح من اي صراف الي سواء كان تابع لنفس المصرف او غير مصرف

المهم كال اسويلك فيزا كارد كتله عادي ماكو فرق 

كملت كلشي الحساب اتفعل والفيزا كال تتأخر تقريبا 10 ايام من تكمل احنا نتصل بيك

رجعت للبيت انتظرت يوصلني كشف بالحساب يعني معلومات الحساب 

اسمي واسم المصرف ورقم الايبان ورقم السويفت كود بس موصلني شي راسلت فرعهم الرئيسي في بغداد وشرحت الحاله كال انت ممودع فلوس بالحساب المهم جان اكو سوء تفاهم والحمدلله انحلت المشكلة لان المديرة اتصلت ثاني يوم وفهمتها بالي صار وره مخلص الاتصال وصلني كشف الحساب ع الواتساب دخلت معلومات الحساب بالادسنس وره 3 ساعات بالضبط وصلني ايميل كالو تم ارسال الدفعات وراح تستلمها خلال 5 ايام كما موضح بالصورة ادناه

وبما انو كورونا موجودة فأكيد راح تتأخر المهم خلال 10 ايام اتصلو عليه من المصرف كالو الفيزا مالتك كملت اتفضل استلمها طبعا لازم اتروح انت شخصيا لان لازم اتوقع وانت بيدك تفتح ظرف الي بي الفيزا وظرف ثاني الي بي الرقم السري

مثل ما موضح بالصورة ادناه

ظرف الرقم السري وظرف الفيزا كارد هاي وره مفتحتها واخفيت المعلومات لان ميصير تطلع لغير شخص لازم انت شخصيا فقط

 

هسه نجي شنو تحتاج من معلومات حتى ادخلها بالادسنس

الي راح اكتبه هو فقط الي اتخلي بالادسنس

طبعا هنا طريقتين لسحب ارباحك من الادسنس 

الاولى عن طريق اضافة حساب الكتروني وهو ما شرحنا اعلاه والمفضل لدى الكل

الثانية عن طريقة الشيكات وهذا ابتعد عنا مسافة 1000 سنة ضوئية لان محد يتعامل بي بالعراق الا ما ندر

 

هسه نختار الطريقة الاولى اندوس عليها وراح تطلع مثل الصورة ادناه

موضح بيها معلومات كشف الحساب 

هنا راح اكتبلكم اسم المصرف لان مموجود بورقة كشف الحساب

والباقي كلها موجودة بالورقة

International Development Bank

 من نضغط على اضافة طريقة دفع 

راح تطلع مثل هاي الصورة

 

طبعا اخفيت المعلومات لان هاي ميصير غيري يشوفها 

هاي المعلومات الي راح اتخليها بالصورة الي فوك

 

بعد ما اتكمل ادخال المعلومات وادوس حفظ 

تنتظر رسالة من الادسنس توصلك ع الايميل ويكلك تم ارسال الدفعات 

يجوز خلال 3 ساعات وتصل الرسالة مثل ما وصلتني اني 

انت وره اسبوع من وصول رسالة من الادسنس انت اتصل ع المصرف استفسر منهم وصلت الارباح او لا 

وتكدر تستلمها مباشر من المصرف او عن طريق الصراف الالي انت براحتك

وان شاء الله يكون الشرح واضح

 

وبالنهاية حبيت اشكر جميع موظفي مصرف التنمية الدولي فرع كركوك 

على حسن المعاملة والاستقبال 

واي سؤال اني حاضر 

اكتبلي بالتعليقات واهم شي تكتب اسمك حتى اعرف على منو ارد 

هذا الشرح راح يبقى بتحديث مستمر اخاف نسيت معلومة شي اكدر اضيفها للشرح

 

يعني كل اسبوع اسبوعين سويلك فره جديدة ع الشرح 😄

تحديث جديد (1)

نسيت ما ذكرته بالشرح 

بعد فتح الحساب ورجعت للبيت وره يوم أو يومين اتصلت بيه مديرة المصرف كالت راح نستقطع منك 10000 دينار يابه مال شنو كالت عمولة كاونتر اني كتلها أوك اني موافق واستقطعو مني مره فقط بس حبيت اوضح هاي النقطة

تحديث جديد (2)

راسلني احد الاصدقاء يريد يفتح حساب بمصرف التنمية الدولي وكال لازم اودع مبلغ 250 دولار أو ما يعادلها بالدينار العراقي يلا اكدر افتح حساب لان جايتهم تعليمات جديدة للمصرف لان سابقا كان الايداع 100 دولار فقط أو 100 الف اذا كان الحساب بالدينار العراقي

يعني الي يريد يفتح حساب حاليا لازم يحضر 250 دولار

تحياتي لكم